Embaixador Japaun nian selebra Inaugurasaun edifísiu eskola iha Suco Manusae, Postu Administrativu Hatulia, Munisipiu Ermera
2022/12/16
Foto grupo
Edifisiu escola foun
Embaixador asina iha platu
Iha loron 16 fulan Dezembru tinan 2022, Sr. Tetsuya KIMURA, Embaixador Japaun nian ba Timor-Leste partisipa iha serimónia inaugurasaun ba edifísiu eskola foun iha Eskola Trindade Lebuto iha suku Manusae, Postu Administrativu Hatulia, Munisipiu Ermera. Serimonia ne'e organiza husi Institutu Matadalan Integradu (IMI), ONG lokál ne'ebé mak implementa projetu ne’e. Sr. Eusebio Salsinha, Presidente Munisípio Ermera, Sr. Raimundo José Neto, Direto r Geral de Política, Plano, Inclusão e Impressão Ministériu Edukasaun Juventude no Desporto nian, ofisiáis governu lokál husi autoridade relevantes, parte interesadas, profesóres, funsionáriu eskola no estudante sira hamutuk ho Embaixador Kimura iha serimónia refere.
Embaixador kaer liman ho estudiante sira ne'ebé hatudu dansa
Embaixador Kimura hato'o ninia profunda gratidaun ba komunidade sira iha suku Manusae no ONG IMI ne’ebé implementa ona konstrusaun edifísiu eskola ne’e ho kapas tebes. “Ha’u kontente atu hatene katak estudante no profesór sira iha ambiente saneamentu ne'ebé di'ak liu, no estudante sira husi klase hitu to'o sia sente konfortavel iha sira-nia klase foun ne’ebé la iha bee suli tama ou perigu ba sira.”
Nia aumenta tan katak “Governu Japaun tau atensaun ba moris ne'ebé seguru no asegura ema hotu-hotu. Ida-ne’e inklui mós ema sira ne'ebé hela iha área remota sira. Tan ne'e mak ami iha projetu barak iha munisípiu hotu-hotu, maske susar atu asesu ba fatin sira ne’e. Porezemplu, ami suporta ona konstrusaun sistema abastesimentu bee moos, postu saude no edifísiu eskola sira total hamutuk 9 ba komunidade sira iha munisípiu Ermera. Ha’u fiar katak projetu sira ne'e hadi'a ona kualidade moris ba ema barak iha rejiaun sira ne’e."
Ba projetu ne’e, Governu Japaun apoiu osan ho montante $90,909 liu husi ninia eskema ida ho naran Fundu Asistensia Seguransa Umana ba komunidade sira iha nível baze (GGP). Liu husi programa ne’e, suporta konstrui ona edifísiu eskola foun ida ho sala de aulas 3 no sentina sira hodi fó benefísiu ba estudantes hamutuk 230 no profesóres hamutuk 13 iha Eskola Trindade Lebuto.
Hahu husi lansamentu projetu dahuluk iha tinan 2000, projetu hamutuk 132 mak implementa ona liu husi eskema GGP iha Munisipiu 14 iha teritoriu Timor-Leste tomak. Projetu sira ne'e liu-liu fornese asisténsia ba infraestrutura komunitária sira inklui konstrusaun no reabilitasaun ba fasilidades eskola, postu saude sira no sistema abastesimentu bee moos hodi responde ba komunidade sira nia nesesidade báziku oioin iha nivel baze.