Serimónia Inaugurasaun Konstrusaun Uma Sentru Saúde Maternal Guisarudu iha Fatobolo, Hatolia B, Munisipiu Ermera
2021/12/17
Embaixador Sr. Kinefuchi asina iha platu
Uma Sentru Saúde Maternal Guisarudu
Komunidade sira halo tradisaun Ermera nian atu simu bairaka sira
Serimónia inaugurasaun ba Uma Sentru Saúde Maternal Guisarudu hala’o ona iha área Guisarudu, Suco Fatobolo, Sub-Distritu Hatolia B, Munisipiu Ermera iha loron 17 fulan Dezembru, 2021. Governu Japaun oferese fundu ho montante mais ou menus milaun 1.5 dolares Amerikanu (US$1.5 milaun) ba “Melloramentu Saúde Reprodutiva, Maternal, Neonatal no Infantil (RMNCH) iha Munisípiu Ermera” no ONG Japones Frontline nudar implementador ba projetu ne’e. Projetu refere implementa ho objetivu atu hasa’e asesu ba atendimentu ho kualidade aas ba servisu RMNCH no atu hadiak saúde maternal no infantil iha Munisípiu Ermera. Liu husi projetu ho durasaun tinan tolu ne’e, ba etapa primeiru, Frontline konstrui ona Uma Maternidade iha Sentru Saúde Guisarudu.
Iha Timor-Leste, Estimasaun atual ba taxa mortalidade maternal mak 2.15 kada bebê foin moris 1,000 no taxa ba bebê mate hafoin partu mak 18 kada 1,000 husi total nasimentu respetivamente. Númeru mortalidade iha munisípiu Ermera aas liu entre munisípiu sira seluk no maioria mate sira-ne’e akontese iha área rurais. Mortalidade sira-ne’e bele evita karik inan isin rua hiak ne’e hetan ajuda husi profesionais saúde kualifikadus sira durante sira isin-rua no partu. Liuhosi konstrusaun sentru saúde maternal iha Guisarudu, espera katak inan-feton nain 600 resin mak sei mai partu iha uma maternidade ne’e kada tinan, no bele hadi’ak moris inan-feton no bebê sira ne’ebe foin moris iha Sub-Distritu Hatolia B.
Embaixador Kinefuchi hato'o diskursu
Iha serimónia ne’e, Embaixador Japaun nian ba Timor-Leste, Sr. KINEFUCHI Masami hateten, "Parabens ba konkluzaun husi Konstrusaun Sentru Saúde Maternal Guisarudu! Konstrusaun husi sentru ida ne’e hanesan parte ida husi projetu tinan 3 nian ho valor orsamentu total serka de milhaun 1.5 dolares amerikanu. Orsamentu ba projetu ida ne’e hetan tulun husi povu Japones no implementa husi ONG Japones, Frontline. Inan saudavel no labarik saudavel mak fator xave ba desenvolvimentu no sira sei lori kontenti ba komunidade. Ida ne’e mak oinsa ita atu kria futuru ida ne’e diak liu ba hotu-hotu. Ikus liu, favor ida labele haluha katak nu’udar belun diak ida, Japaun sei kontinua hodi suporta povu Ermera no desenvolvimentu husi nasaun foun ida ne’e. Mai ita la’o hamutuk hodi lori roman ba futuru Timor-Leste nian".
Senhora NAKAJIMA Kayono, Chefe Reprezentante Frontline, subliña katak “Uma sentru saúde maternal sei la reduz direitamente mortalidade materna no bebê foin moris. Esforsu komunidade mak xave atu simu kuidadu ne’ebe konsistenti, hanesan kuidadu ante-natal, partu ho ajuda husi profissionais saúde, no kuidadu pos-natal. Projetu ne’e mos sei apoiu profissionais saúde sira atu hadia sira-nia kapasidade. Ami espera katak projetu ne’e sei fornese kuidadu efikas no efisiente ba inan-sira no bebê foin moris. Ha’u espera katak sentru saúde maternal Guisarudu sei sai nudar modelu ba sentru saúde maternal iha Timor-Leste no sei uza husi inan isin rua no bebê sira iha área ne’e”.
Uma Sentru Saúde Maternal ne’e inaugura husi Sr. KINEFUCHI Masami, Embaixador Japaun nian ba Timor-Leste, no S.E. Sr. Marcelo Amaral, Director General, Ministerio de Saúde. Eventu ne’e mos hetan prezensa husi Sr. Eusébio Salsinha, Prezidente Autoridade Munisípiu Ermera, nomos Sr. Antonio de Deus Fatima, Diretor Servisu Saúde Distrital Ermera.