Governu Japaun entrega Ambulansias no Ekipamentu Médiku hodi kombate propagasaun COVID-19

2021/5/12
Ministra Saúde dr. Odete Maria Freitas Belo (C) Ministerio da Saude
Embaixador KINEFUCHI Masami (C) Ministerio da Saude
Serimónia 1 (C) Ministerio da Saude
Serimónia 2
Ambulansias (C) Ministerio da Saude
  Iha loron 12 fulan Maiu, 2021, Embaixador Japaun nian iha Timor-Leste entrega ona ambulansias no ekipamentus médiku hodi kombate propagasaun COVID-19. 

  Ekipamentus ne’ebe mak entrega iha projetu ida ne’e, ho valor orsamentu milhaun 4.6 dolares amerikanu, inklui ambulansias 38, carrinhos de emergência 12, manômetros de pressão arterial 765, estetoscópios 765, autoclaves 12, incubadoras infantile 10, bomba seringa 18, monitores de cabeceira 70, leitos hospitalares (kama hospital) 240, no gerador 2. Ekipamentus médiku hirak ne’e sei utiliza iha Hospital Nasional Guido Valadares (HNGV), Fasilidade Izolamentu iha Vera Cruz, no hospital referral 5 (Baucau, Maubisse, Maliana, Covalima, Oecusse). Alemde fasilidades hirak ne’e, ambulansias sei utiliza mos iha municipiu hotu.

  Iha serimónia ne’e, Embaixador KINEFUCHI Masami iha ninia deskursu hateten katak “Kona ba funu hasoru COVID-19, ha’u hakarak louva esforsus hirak ne’ebe mak Governu no Povu Timor-Leste halo ona hodi kontra surtu feroz ida ne’e. Agora dadaun tempu ba ita hotu hodi pasensia no kontinua ita nia esforsu hotu hodi luta hasoru virus ida ne’e. Haree fila fali ba istoria nasaun nian, iha luta hodi restora independensia, itaboot sira hotu hatudu ona resistensia no solidaridade iha tempu naruk. Nune’e, ha’u fiar katak itaboot sira bele hasoru difikuldade saida deit mak imi infrenta.”

  S. E. Sra. Odete Maria Freitas Belo, Ministra Saude, hateten, "Ein nome do Oitavo Governo Timor-Leste, Ha'u hakarak hato'o obrigado wa'in ba Governo Japaun". "Ho ambulâncias no ekipamentu médikus ne'ebe oferese mai ita, pasiente barak liu tan mak bele hetan tratamentu no salva moris barak liutan". 

  To’o ohin loron, Japaun oferese ona asistensia oi-oin hodi responde ba luta hasoru COVID-19 iha Timor-Leste, kompremitidu hodi oferese asistensia milhaun 16 resin dolares amerikanu. Ida ne’e inklui mos suporta distibuisaun vascina liu husi oferese equipamento de cadeia de frio inklui fasilidade ba gestaun temperatura malirin regional no transportasaun.