Resepsaun ba Aniversáriu Imperador Tinan 2023

Iha loron 23 fulan Fevereiru, Embaixador no Sra. Kimura organiza resepsaun ida iha residensia ofisial Embaixador nian ba okaziaun Loron Aniversáriu Sua Majestade Imperador. Sira hetan honra hodi simu S. E. Dr. José Ramos Horta, Presidente Repúblika Timor-Leste nian nune’e mos Ministru sira, Vice-Ministru sira, Sekretáriu Estadu, chefe no membru sira husi korpu diplomátiku, agensia ONU sira, organizasoens internasionais no sosiedade sivil. Total iha serka de 200 bainaka mak marka prezensa iha resepsaun ne’e.

Resepsaun kalan ne’e loke ho Hino Nasional husi país rua, ne’ebe kanta husi Sra. Miyako Kuwae, kantora ópera Japonês. Hafoin ida ne’e tuir kedas ho deskursu husi Embaixador Kimura, ne’ebe espresa ninia felisitasoens ba Sua Majestade Imperador ba ninia aniversáriu ba dala 63, refleta mos ninia esperensia nu’udar Chamberlain ba Sua Majestade, ne’ebe mak iha tempu ne’ebá sei hanesan Sua Alteza Real o Príncipe Herdeiro, entre 2012 no 2015. Embaixador Kimura mos esplika kona ba meta tolu ne’ebe mak nia rasik estabelese ona ba nia a’an durante nia mandatu; hametin kooperasaun iha indústria importante sira iha área agrikultura no peskas; konvida kompania Japonês barak liutan hodi mai investe iha Timor-Leste, iha área sira hanesan energia, ambiente no peskas; no promove relasaun entre ema-ba-ema ne’ebe mak nu’udar baze ba amizade entre nasaun rua.

Tuir mai, Presidenti Ramos-Horta mos hato’o nia deskursu felisitasoens hodi lembra hikas ninia memória sira hamutuk ho Sua Majestade Imperador no espresa ninia apresiasaun ba komitmentu Japaun nian ba desenvolvimentu Timor-Leste no moris diak povu nian. Hafoin deskursu, bainaka balun hetan konvite hodi sa’e ba palku hodi tuir kagami-biraki, serimónia tradisional Japonês ida, ne’ebe hala’o iha eventu selebratóriu sira ne’ebe simboliza abertura ba harmonia no sorti diak.

Bainaka hirak ne’ebe marka prezensa iha resepsaun ne’e reafirma hikas amizade entre Japaun no Timor-Leste.