Hau nia moris nu'udar estudante iha Japaun (MEXT Scholarship: Diva da Silva)

 Ola kolega sira ! Ha’u-nia naran Diva da Silva no ha’u nu’udar estudante Mestrada iha Universidade Nagoya. Ha’u nia estudu foka liu ba dejenvolvimentu iha mundial klean liu iha area edukasaun. Agora dau-daun ha’u nu’udar estudante primeiro ano no ha’u nia peskiza foka liu ba formasaun profesor sira nian liu-liu formasaun kontinuasaun ba profesor sira iha eskola publiku. Ha’u nia mehi ba edukasaun iha Timor-Leste mak sei dejenvolve no iha kualidade ne’ebe diak nune’e ha’u fiar katak mestre sira sai nu’udar aspetu importante hodi kontribui ba dejenvolvimentu edukasaun nian. Programa prioridade ba edukasaun baziku ne’ebe hakerek iha planu no estratejia edukasaun nasional Timor-Leste nian maka hasa’e kapasidade hanorin nian liu-husi promove formasaun manorin sira nian. Durante ha’u nia estudu, ha’u aprende barak husi professor hirak nebe riku iha matenek no iha esperiensia lubuk iha area eduksaun nian tantu iha rai laran no rai liur.

 
 
 

 Ha’u fiar ema barak aseita katak Japaun hanesan nasaun nebe dejenvolve tebes nune’e ha’u mos aplika bolsa MEXT nian no neste momentu hau esperiensia hela moris iha nasaun ida ne’e. Kualidade edukasaun iha Japaun avansadu tebes no ida ne’e hanesan oportunidade di’ak ida mai ha’u hanesan estudante internasional ne’ebe mai husi nasaun kiik hodi aprende husi profesor sira, ha’u-nia supervizor rasik no mos husi estudante internasional sira seluk mos. La’os de’it atu hetan matenek, maibe Japaun mos fo oportunidade mai ha’u hodi esperiensia sira-nia kultura, koko sira-nia hahan (la’os deit Sushi), halo kolega ho Japoneza sira no mos estudante internasional sira seluk, oh no hasai fotografia iha ai-Sakura nia okos J. Ba hirak nebe hakarak esperiensia moris iha rai liur, Japaun sai hanesan opsaun ne’ebe di’ak tebes hodi hariku O-nia esperiensia no Japaun mos iha buat barak tebes nebe sei serve O.