Emperador nia aniversariu

 

 

Embaixador nia diskursu

 

 

　Obrigadu wain ba ita boot sira nia prezensa ohin loron. Ida nee hanesan onra no privilejiu boot ida mai hau atu selebra hamutuk ho imi loron moris ba dala hitunulu resin nen no aniversariu ba dala ruanulu adezaun ba tronu husi Sua Majestade Emperador Japaun iha rezidensia foun ida ne’e. Sua Majestade sei tama ba tinan hitunulu-resin-nen iha loron ruanulu resin tolu fulan Desembru. Sua Majestade iha kondisaun nebe diak. Iha Abril tinan ida ne’e marka aniversariu ba dala limanulu moris nudar kaben-nain husi Sua Majestade Emperador no Emperadora. Area importante ida husi atividade Sua Majestade mak relasaun amigavel internasional. Iha okaziaun aniversariu Proklamasaun Independensia Timor-Leste foin lalais nee, Sua Majestade hato’o nia parabens ba Sua Exelensia Doutor Jose Ramos Horta Presidenti Timor-Leste.

 

　Iha Timor-Leste, tinan ida nee importante tebes basa komemora aniversariu ba dala sanulu konsultasaun popular. Ho esforsu no sakrifisiu husi beiala sira, lider sira, no povu tomak, paz no estabilidade bele realiza no konsolida dadaun. Hau hakarak atu konta ho imi hau nia tributu ba sakrifisiu no esforsu hirak ne’e.

 

　Agora dadaun, Timor-Leste hala’o esforsu atu hari’i nasaun ho liafuan adeus konflitu, benvindu dezenvolvimentu. Japaun sei serbisu besik liu tan ho Timor-Leste no fo nia apoiu tomak bazeia ba posesaun Timor-Leste no respeitu malu.

 

　Tinan ida ona dezde hau nia hi’it an mai iha ne’e. Hau visita ona distritu sanulu resin tolu. Hau bele sente pas no dame iha distritu sira ne’e. Hau mos estuda liafuan hanesan, kaer liman no la’o hamutuk husi Timor Oan. Hau mos estuda ona kantiku sira hanesan Ina Lou, O Doben, no O Rai Timor. Hau kontente ho hau nia aan nebe gosta tebes Timor-Leste duke sira seluk. Iha maizoumenus Japones atus ida iha Timor-Leste. Sira servisu nudar membru ba JICA, ONG sira, grupu relijiouza, emprezariu privada, Nasaun Unidus, Embaixada no sira seluk. Japones hirak ne’e no hau rasik nudar ema sira nebe gosta tebes Timor-Leste.

 

　Klosan no labarik sira nudar ativu murak ida nebe sei lori iha kabas futuru nasaun ida nee. Se klosan no labarik sira forte, nasaun mos forte! Hanesan nasaun doador sira seluk halo, Japaun kontinua serbisu hamutuk ho governu Timor-Leste atu tau matan ba klosan no labarik sira.

 

　Ohin, ita hamutuk ho Presidente Ramos Horta no estudante sekundariu sira hodi kuda ai-kameli iha fatin ida nee. Ai-kameli bele dehan nudar simbulu aihoris iha Timor-Leste. Hau konsiente katak Timor-Leste hala’o esforsu makas atu kuda aihoris oi-oin hodi preserva ailaran ba jerasaun futuru. Nudar ema ida nebe gosta Timor-Leste hein katak rai Timor-Leste sei sai nasaun nebe nakonu ho matak no hamnasa midar husi povu Timor-Leste iha futuru.

 

　Kaer Liman hamutuk, Servisu Hamutuk, Lao Hamutuk. Hau fiar metin katak ITA BELE, TAMBA ITA BELE DUNI.

 

　Boas Festa do Natal no Feliz Ano Novo

 

　Obrigadu wain.

 

 

(c) Embassy of Japan in Timor-Leste　　Avenida de Portugal, Pantai Kelapa, Dili, Timor-Leste (P.O. Box 175) Tel: +670-3323131 Fax: +670-3323130