Asistensia Japaun nian ba Timor Leste

 

 

Seremonia graduasaun kursu auto-mekanika

 

Seremonia graduasaun kursu auto-mekanika hala’o ona iha Dili Institute of Technology (DIT) iha loron 28 Outubru 2011.

 

Kursu ida ne’e ho objetivu atu oferese abilidade fundamental ba estudantes Timor Oan sira iha parte auto-mekaniku nian basea ba padraun Japones sira nian. Kursu ida ne’e hetan asistensia fundus husi Governu Japaun ho montante 452,774 dolares Amerikanu no implementa husi ONG Japones ida ho naran JDRAC, liu husi sira nia projeitu ida ho naran “Projeitu Treinamentu Auto-Mekaniku iha Timor-Leste”. Projeitu kursu treinamentu ne’e komesa ona iha fulan Marsu tinan ida nee no kompleta ona iha Outubru. Objetivu jeral husi projeitu ida ne’e mak atu hadiak rekursu humanu iha Timor-Leste. Graduantes sira husi kursu ida nee hetan ona kunhesementu substansial atu hadia kareta sira no halao manutensaun ba kareta sira. Ho esperansa boot ita hein katak sira sei atinji sosiedade nebe mak ho seguransa trafiku avansadu nebe mak mai husi sira nia abilidade hadia kareta no prevene problema mekaniku nebe mak bele resulta asidenti trafiku.

 

Iha seremonia ida nee Sr. Satoshi Nakajima, Ministru Conselheiro husi Embaixada Japaun, hato’o parabens ho laran tomak ba graduantes sira nain 30 nebe mak ho susesu kompleta ona sira nia treinamentu no espera katak sira sei hetan susesu boot iha sira nia kareira professional.

 

Sr. Mikio Noda, reprezentante JDRAC nian iha Timor-Leste, enkoraja partisipantes sira hotu atu tau atensaun ba buat importante tolu atu nune sir abele susesu nudar auto-mekanika iha iha futuru, buat tolu ne’e mak, nunka atu haluha sira nia motivasaun original wainhira tuir treinamentu nee, nunka atu desisti, no tau valor liu ba amizade.

 

Sr. Estanislau Saldanha, Reitor husi Dili Institute of Technology espresa ninia apresiasaun ba Governu no povo Japaun ba asistensia hirak nebe mak fo ona liu husi treinamentu auto-mekanika nee.

 

 

(c) Embassy of Japan in Timor-Leste　　Avenida de Portugal, Pantai Kelapa, Dili, Timor-Leste (P.O. Box 175) Tel: +670-3323131 Fax: +670-3323130