Relasaun Publiku no Kultura

 

 

“Programa JENESYS hodi Haruka Atleta Maratona mai Timor-Leste”

 

 

Atleta Maratona nain rua husi Japaun mai visita Timor-Leste husi Maiu 15 to’o 15 hodi partisipa iha Dili Peace Marathon iha maiu 12 no promove interkambiu desportu hamutuk ho foin sa’e Timor Oan sira liu husi programa JENESYS (Japan-East Asia Network of Exchange for Students and Youths).

 

Iha Maiu 10, atleta Japones nain rua ne’e hala’o conferensia ba imprensa hamutuk ho Sra. Yuko Arimori, ne’ebe mak manan medalha prata no bronze iha iha halai maratona feto nian tinan 1992 iha Olimpiku Barselona no tinan 1996 Olimpiku Atlanta. Nia simu konvite husi Presidenti Jose Ramos-Horta no hola parte iha Dili Marathon.

 

 

Atleta nain rua ne’e mos atende klinika Maratona, ne’ebe mak hala’o husi Sra. Arimori ba atleta maratona Timor Oan sira. Sr. Augostu Ramos ne’ebe mak hetan konvite ona hodi partisipa iha Tokyo Maratona iha Fevereiru tinan ne’e mos atende klinika ne’e. Klinika Maratona ne’e hala’o ho susesu tebes iha situasaun ne’ebe mak nakonu ho amizade, iha ne’ebe atleta Japones no Timor Oan sira hetan oportunidade diak hodi halo kolega ba malu.

 

 

Iha Maiu 11, atleta Japones nain rua ne’e halo visita kortezia ida ba Presidenti Ramos-Horta hamutuk ho Sra. Arimori no hato’o sira nia antuziasmu boot ba halai Dili Marathon iha loron tuir mai. Iha Maiu 12, sira partisipa iha Maratona no Sr. Kawauchi no Kitahara uda-idak hetan primeiru no kuartu lugar iha half marathon.

 

 

Duranti sira nia visita mai Timor-Leste, atleta Japones sira ne’e mos halo visita kortezia ba iha Embaixada Japaun no fahe sira nia impresaun kona ba Timor-Leste. Sira visita mos ONG Ba Futuru, Fundasaun Alola no hola parte iha festa simples ida hamutuk ho foin sa’e Timor Oan sira, atu nune’e sira bele hakle’an liu tan sira nia komprensaun kona ba Timor-Leste no nia povu.

 

 

 

Programa JENESYS: programa JENESYS (Japan-East Asia Network of Exchange for Students and Youths) nu’udar projeitu ida ne’ebe mak inisia husi governu Japaun ho hanoin ida atu oferese fundasaun id aba solidaridade forti entre rejiaun Asia liu husi interkambiu joventude ho eskala boot. Programa ida ne’e espera atu desenvolve rede humana ida entre foin sa’e sira ne’ebe mak sei hola fatin atu lidera iha Japaun no nasaun Asian sira seluk iha futuru. Programa ida ne’e mos espera atu estimula joventude Japones sira nia interese ba nasaun sira iha Asia. Komesa husi 2007, ami hala’o ona programa interkambiu hirak ne’e ho objetivu atu promove komprensaun diak no relasaun amizade. Iha tinan 4 ikus ne’e komesa husi Timor-Leste mos inkluindu iha programa ne’e, joventude Timor Oan nain 74 ona mak ba visita Japaun liu husi Programa Konvite JENESYS.

 

(c) Embassy of Japan in Timor-Leste  Avenida de Portugal, Pantai Kelapa, Dili, Timor-Leste (P.O. Box 175) Tel: +670-3323131 Fax: +670-3323130